Ralhrang in palik sakhan an urkang ih zeng nat nei palik 1 an tan men

Ralhrang in khua an nawhkang hnuah palik sakhan khal a urkang lawlaw ih an tlanhlo. Palik zeng pakhat an tan.

Magway ramthen, Myaing peng, ဗဟင်း palik sakhan cu November 21 ah tualsung hriamhrei kai pawlkom in ralthuam tum in an kah thu Black Panther Army (BLPA) hotu MC in a sim.

ဗဟင်း Palik sakhan ih bukhuar ralhrang pawl hi ရေစကြို ခလရ  258 ralhrang an si ih ထနောင်းကုန်း khua an nawhkang hnuah ဗဟင်း khua ah a ra kirtu pawl an sim.

Tualsung hriamhrai kai pawlkom pawl cun nazi 5 lenglo an kap ih ralhrang lam an tuar nat tuk ruangah an umnak palik sakhan an urkang ih an tlanhlo thluh, tiah an sim.

Ralhrang pawl cun  ဗဟင်း  palik sakhan ih palik innsang pawl an zaten an hruai ih Myaing khawpi lamah an fehpi nan, sakhan ah zeng nat nei, palik sergeant pakhat an tan ih tangka thawnghra an siah ta, tiah an sim.

An tanmi palik Sergeant Win Ko Ko Aung cun, “Zeng nat (Layphiat) ka si ruangah in phatsan ih in tan men. Ni khatkhat ah kan damthasal dingih kan tongaw leh cek ding.

An hamtha aw seh, a thithi, a nungnung kan si lai ding. An parah ka lungawi thei thlurthlo lo,” tiah tualsung hriamhrei kai pawl in video ih thu an suhnak ah a rel.

Hi palik Sergeant cu tualsung hriamhrei kai pawl in kut an thlak lo hleiah hmun himnak ah kuat an tum thu Myaing PDF ih tuanvoneitu cun a sim.