Falam fimthiamnak zung ih hnatuan Pa Lal Lian Thawng ralhrang in an kap that

Kalaymyo ah ralhrang in Pa Lal Lian Thawng an kap that.

Kalaymyo, Tahan veng, Wesley sizung kelnak lamzin ih ralvengtu SAC ralhrang pawl in lamzin ih bike to, Pa Lal Lian thawng an kap that, tiah theih a si.

Pa Lal Lian Thawng hi Chin ramkulh, Falam peng, Thanhniar khawmi a si ih January 9 ah Falam ihsin Kalay ah a suk.

Zan nazi 6 hrawngah ralhrang ralvennak gate hmaiah bike to in a feh laiah an kap ih a thi. A ruak cu January 10 zing ah Letpanchaung car gate hlun kiangah sar a si.

January 9 ah Wesley sizung kelnak ih ralhrang ralvennak gate cu Kalay PDF Operation MoMo in an kap.

Curuangah ralhrang lamih an hmuhmi ta poh an kap ih Pa Lal Lian Thawng in a thih phah, tiah theih a si.

Pa Lal Lian Thawng hi Falam Township Education ah hna a tuan ih CDM tuahtu a si ih Malaysia feh tum in Kalaymyo ih suk a si, tiah Falam khawmi pakhat in a sim.

Pa Lal Lian Thawng cun nupi le fate 3 a fehsan, tiah theih a si. A ruak cu tui’ zing January 11 ah Falam ah a thleng fel zo.