Myitkyina Nurse pakhat le a ngaizawng an kai.
Kachin ramkulh, Myitkyina khawpi ih bulpak sizung a simi မြတ်မွန် sizung ih nurse pakhat cu March 14, zan nazi 9 ah a ngaizawng thawn SAC ralhrang in an kai, tiah The 74 Media in a tarlang.
“Hnipuan menmen hruh mi pathum an ra. A ngaizawng hi Myothitgyi ah a um. Anih hi Engineer a si ih an kai ve,” tiah an sim.
SAC ralhrang ih an kaihmi Nurse hi kum 25 mi Ma Chit Suu Wai a si ih sizung ah zan ih duty a tuan laiah an kai, tiah theih a si.
“SAC ralhrang in sizung neitu an call ih reilote kan hruai sung ding, tiin an hruai. A rualpi pakhat in a thlun nan, anih cu a ra kirsal zo. Nurse lawngte a ngaizawng umnak ah an fehpi ih an pahnih in an hruai,” tiah sizung hnatuan hmin tarlang remti loin a rel.
Nurse Ma Chit Suu Wai hi မြတ်မွန် sizung ah thla nga lawng hna a tuan man ih Sagaing hmatpungtin kengtu a si. Ziangruangbikah an kai timi theih a si lo.
AAPP ih ngankhumnak ahcun 2021 February 1 ihsin 2023 February 25 tiangah SAC ralhrang in nunau 3125 an kai zo ih 570 cu daantat an si, tiah an tarlang.
Leave a Reply