Ralhrang in naupai tel in CDM saya/ma le nurse mi 5 an nunglai in an ur that

SAC ralhrang cun Yezakyo saklam ih N-YSO sakhan an siim laiih an kaihmi 5 pawl cu an nunglai in an ur that, tiah N-YSO cun thu an suah.

SAC ralhrang cun June 10 ahkhan N-YSO sakhan siim dingin lamzin kaa thum in an pok.

Cumi cu N-YSO lamin an rak bawh ih bomb an rak puah ruangah ralhrang 13 an thi ih hriamtuar khal an tam zet, tiah theih a si.

Asinan ralhrang hi an tam tuk ruangah N-YSO sakhan cu an kulh thluh ih N-YSO ralkap pawl cu dungah an sip.

Khuami thenkhat lamhmuhtu ah ralhrang in an kaih hleiah N-YSO ralkap 5 khal an kai ih an nunglai in meisa in an ur that hai.

An thahmi pawl cu CDM tlawng sayagyi U Win Kyaw, Nurse Daw Zalay Naing, Ma The Ei Ei Win, CDM tlawng sayama naute thla 5 pai lai Daw Khin Hnin Wai le ralhrang bomb kamtu Ko Wai Khung pawl an si.

“Ralhrang cangvaih dan hi milai thinlung khal an nei lo. Phungphai tlu loin an kaihmi pawl an nunglai rori in an ur that. Hihi kan hrangah riahsiatza a si nan, thazang thar la in kan do pehzom ding,” tiah Yezakyo-PDF tuanvoneitu in a rel.

SAC ralhrang pawl cu an cangvaihnak an pehzom vivo hrih ih Wutta khua, Tit Kyi Taw khua pawl an luhhnuh.

Tit Kyi Taw khua inn pawl an urkang. Asinan an kirsal lamah bomb an rak puah ih ralhrang 2 an thi ih hriamtuar khal an um hnuaihni, tiah N-YSO cun thu an suah.

Cun, Dan Pyin Kan khua ah inn le lo nawkkangtu ralhrang pawl cu an rak do ih thi le hriamhma ngah an um.

Hi doawknak ah N-YSO, MSPDF, Chaung U PDF, Gen timi dothlengnak pawlkom pawl an tel.