Bago ramthen, Kyaukgyi peng ah SAC ralhrang in Karen mino 23 an kai ih lamzin parah an kut dunglet in hridai an khih hleiah sunvu in an hrem, tiah KNU in July 14 ah thu an suah.
SAC ralhrang ralkap Kha Mah Yah-599 le tangrual pawl cu July 13 ah Kyaukgyi peng, Alesu khua le Wapin khua ah an kapaw. SAC ralhrang pawl cu khawsung ah an lut ih khuami tam zet an kaih hleiah inn sung thilri an siatsuah.
KNU ih thusuah ahcun SAC ralhrang pawl hin an kaihmi lakah Kawl pawl cu kut dunglet hridai ih khih khal an tong lo. Karen mino 23 lawngte hridai in an kut dunglet an tawn hleiah sunvu in an hrem hai, tiah an sim.
SAC ralhrang ih thiltuah dan cu miphun thleidanawknak rori a si, tiah palik pinsin la zotu pakhatin a sim.
“Ziang a si khal le kan neh ding a thupi bik. Ziangtivekin miphun lakah thleidanawknak suak khal sehla kan tanrual a tul hrih. A hlanih palik bawi Than Hlaing hmanin amai suahpi unau rori a that men a sisi. A dang cu sim le rel ciamco a tul lo,” tiah a sim.
July 12 laiah KNU ih luah ram sung, Ledo Soe peng ih Wasukho khua le Khitu Khi khuami pahnih SAC ralhrang ih an kaihmi khal tu tiang an thlah hrih lo, tiah theih a si.
Leave a Reply