Sagaing ramthen, Minbu peng ah SAC ralhrang pawl cun khuami mi 4 an tlanter ih an dunglam ihsin an kap that, tiah tualsungmi pawl hnen ihsin theih a si.
June 5 ahkhan Minbu peng, Kan Pyia le Kone Nyin Seit khua ah SAC ralhrang an lut ih mine 3 kam in PDF pawl in an rak do.
Simlam nazi 1:30 hrawngah SAC ralhrang pawl cu Htee Sawng ihsin Kan Pyia lamah ralhrang 80 kiangkap an ra luhsal ih Kan Pyia khawhnar ih thlam pawl an urkang hmaisa. Kan Pyia khuami pakhat khal an kap that cih, tiah an sim.
Cumi hnuah khuami thenkhat an kai ih an kaihmi pawl cu an tlanter hnuah an dunglam ihsin hmuibahnak ah hmang in meithal in an kap that hai, tiah Minbu thuthang phuangtu cun a sim.
“Hriamhrei keng lo, khuami mino 4 pawl cu, ‘nan zalennak hrangah tlan uh,’ tiah an auh ta ih ramtawipa in ramsa a kah men bangin an dunglam ihsin an kap that,” tiah tualsung thuthang cun a suah.
Cu hleiah tualsungmi pakhat cun hitin a rel hrih. “Kan khaw pacang pakhat cu a kedam a thlau ih a sarzawng ah a kun. Cumi cu ralhrang pakhat in a hmu ih, ‘na tlansuak tum mawsi’ tiin a kaa angter in a kaa sungah meithal a hmawmter. Cumi hnuah meithal a hmet puak.
Cun, nunau pakhat cu a dip sungih thil um zaten an phorhter. Sui le sumpai tam zet an laksak. A sui neihmi le sumpai an laksakmi hi ting 100 lai a si ding,” tiah a sim.
SAC ralhrang cun ui ar vek menin an nung ih khuami pawl an kap that rero. An kah thatmi hi mi 7 an si ih an kaih ih ralphaw ih an hruaimi hi mi 11 an si, tiah mipi ralkap PAFD cun an sim.
Leave a Reply