Kyaukpadaung peng, Bo The khuami Myinchan phunsang tlawng ah tlawngta hlun kum 21 mi Ko Hein Zeyar Phyu le kum 20 mi Ko Hein Zeyar Oo cu SAC ralhrang in an kap that, tiah Kyaukpadaung PDF cun thu an suah.
Hi mino pahnih hi June 1 ah Letpyan Pya palik sakhan ah an kai ih June 3 ah palik sakhan ihsin ralhrang tatma 99 hnenah an ap. June 4 ah ralhrang hremawknak hmun ah an that. Ralhrang hremawknak hmun ahcun Ko Hein Zeyar Oo cu a lu ah meithal in an kap that. Ko Hein Zeyar Phyu lawngte meithal ih kahnak hriamhma ah thisen a suak tam tukih a thi, tiah an tarlang.
An kah khatmi mino pahnih hi Kyaukpadaung PDF sungtel an si ih ralhrang in an kaih hnu an hrem, an vuak rero lai khalah rinum zetin zianghman an rel duh lo ruangah that an si, tiah theih a si.
An ruak hi sungkhat nu le pa theihter duh loin sun laifang ah mei in an urkang. PDF ralkap Hein Zeyar Phyu le Hein Zeyar Oo cu raltha zetin ral an do ih thih tiang rinum zetin rampi hrangah an nun an liam ruangah Kyaukpadaung PDF cun ‘paraltha’ sinak pe in sunlawihnak an nei ih an phuba hlamsak dingah thukamnak khal an nei cih.
Leave a Reply