Ralhrang in an kai ih a rualpi pawl a phuan ruangah an kai bet rero

Karen ramkulh, Myawaddy khawpi ah Poeple’s Liberation Army (PLF) pawl cu ralthuam tam zet thawn SAC ralhrang in an kaih thu theih a si.

Myawaddy khawpi ah June 24, sun nazi 1 ah Ko Saing Nay Linn le a rualpi pahnih cu SAC ralhrang le ralhrang lamtang BGF pawl in an kai.

Hi an kaihmi thawn pehparaw in SAC ralhrang lam cun thusuah an nei hrih lo nan, Ko Saing Nay Linn ih hmanmi Facebook Account ihsin ralhrang pawl in a rualpi dang pawl kaih tum in an pehtlaih rero, tiah theih a si.

“Ko Saing Nay Linn hi a hlanah cun KNDO ah training a kai. Asinan KNDO sungtel cu a si lo. Lay Kay Kaw ah ralthuam a zuar ruangah vei khat kaih a tong dah.

A hlanah NUC timi a din. Atu ahcun PLF a din lala. Sumpai bomnak thu ah a thang a sia. Amai’ ruangah kaih tongmi khal an um hnuaihni zo. Atu khalah phone an biaktermi Myawaddy ah mi 3 an kai bet,” tiah PDF cangcawitu Ma Kay cun a sim.

An kaihmi hi Saing Nay Linn, Ma Myo Thuzar le Ko Ye Sett an si ih Myawaddy palik sakhan ah an kol lai, tiah theih a si.