Ralhrang ih kidnap-mi mipi kah tel an duh lo ruangah PDF 1 in nunliam phah

Magway ramthen, Myaung peng, khua pakhat ih raltlan pawl cu SAC ralhrang in milai ralphaw ah hmangin PDF ralkap pawl an rak bawh.

October 31, zinglam nazi 10 hrawngah အင်ပင် khua ihsin poksuak ralhrang 40 hrawng cu khawsung an lut ding, ti an theih ruangah PDF pawl in khawsungmi pawl rak relh hai dingin va sim an tum.

Asinan ralhrang in an rak thlen khelh ih khawsungmi ziangmawzat milai ralphaw an kaih hnuah PDF pawl an rak bawh.

“Tlang par ihsin kan ttumzawng ah khawsungmi pakhat cun, ‘hi lamah ra hlah uh, ralhrang in an lo bawh’ tiah in auh. Kan kah ding asile a remcang lo. Khawsungmi milai ralphaw ah an hman ruangah mipi kah tel a tul.

Curuangah dungah kan sip men,” tiah Zarmani Blood Guerrilla Army ZBGA ih ralkap 1 cun a sim. Cuti dung an sipzawng ah ralhrang lamin an rak kap ih ZBGA ralkap Block timi cu a hmun ah a thi.

Mi 2 in hriamhma an tuar fawn. ZBGA ralkap Block ih ruak cu ralhrang pawl in inn pakhat sungah an duah ih a inn cop in an urkang, tiah a sim.

Atu-ahhin ralhrang in khawsungmi 5 pawl cu milai ralphaw ah an hruai vivo ih ရေစကြို peng, ဆင်တံခါး khaw lamah an fehpi.

An kaihmi lakih mi pakhat cu a ke ah meithal ih kahnak hriamhma a tuar, tiah theih a si.