Sagaing ramthen, Chindwin vapi nitlaknak lam ih duhphorhnak hotu pakhat le Depayin mino 2 cu SAC ralhrang in an kai ih ralhrang hremhmun ihsin an tlansuak nan, mi 1 cu an kaisal ih a thi, tiah thuthang a suak.
July 2 ahkhan Botalin khawpi le Depayin peng karlak Kato khaw kiangah Chindwin nitlaknak lam duhphorhnak hruaitu mino pakhat Win Moe Zaw le Depayin khuami mino 2 cu ralhrang pawl thawn tongaw in kaih an tong, tiah Monywa duhphorhnak hotu cun a sim.
Kum 19 mi Ko Win Moe Zaw thawn an kaihtlangmi mino pahnih cu Botalin peng Ku Taw khua ih palik sakhan ah an hrem an vua.
July 3 zingpit ah an pathum in tlannak remcang an hmu ih an tlansuak ko nan, mi pahnih lawng an luat ngah.
“Annih pathum hi hridai ih khih an si. Mino pakhat cun a kiangih a rualpa hridai ih khihmi cu a phelhsak. Cumi theh in an pahnih in an phelhaw thei.
Cu theh in an pahnih cun Ko Win Moe Zaw cu an phelhsak. Ko Win Moe Zaw hi a mit tiangin hridai in an tuam ruangah phelh a harsa deuh. A kut dunglam ah hridai in an tawn tikah caan lak rei a tul.
An pathum cun an phelhaw ngah thei ih ‘1…2…3’ tiin an tlansuak.
Hmun hla nawn an thlen tikah dunglam an zohawsal cu Ko Win Moe Zaw a rak tel lo ih mino pahnih lawng an hmuaw.
Ko Win Moe Zaw in tlansuak thei loin a cangsual ih palik pawl in an kaih hnuah ralhrang hremhmun ah a thi, tiah thuthang a suak.
(Kan thulaknak Myaelatt Athan cun hi thu hi a nemhnget thei hrih lo).
Leave a Reply