Ralhrang dinpitu zungkainak an kap, inn za lal (ရာအိမ်မှူး) a thi

Bago khawpi, Kalyani veng ah khawlal zung hmaiih a to laiah inn za lal cu kah that a si.

2022, June 16, zan nazi 8:00 hrawngah Bago ramthen, Bago khawpi ih Kalyani veng, khawlal zung hmaiah SAC ralhrang ih retmi inn za lal (ရာအိမ်မှူး) pakhat an kap that.

Hi inn za lal hi khawlal zung hmai luhnak gate rori ah a to laiah bike ih phuraw mi pahnih cun an kap that, tiah CCTV ih rak zuk ngahmi cu online ah a darh nasa.

A thitu hi inn za lal ti lawng a si ih a hmin ngai theih a si lo. Khawlal lawngte U Myint Aung a si ih SAC ralhrang dinpitu Sandi Myint Aung ih pa a si thu Mizzima thuthang cun a tarlang.

Hitawk zung ahhin Sandi Myint Aung amah rori a to theu, tiah tualsungmi pawl cun an sim.

Kalyani veng ih khawlal zung hi SAC ralhrang in thuneihnak an lak hnuah tu le tu kah an tong leuhleuh.

2021 June 17 ah vei khat, 2021 October 25 ah vei khat bomb ih puak a rak si dah.