SAC ralhrang dinpitu ruhkol le ralhrang uknak hngetkhoh dingih thuhla thehvorhtu zaithiam Yin Let cu a inn hmaiah bomb an kam nan, a puah man hlanah ralhrang in an thianfai man, tiah theih a si.
Yangon ramthen, Bahan Township, Kyaikkasan veng, Usaphara lamzin ah tuni June 13 ah ralhrang dinpitu zaithiam Yin Let ih inn hmaiah bomb kam a si nan a pelhsolh. A puah man hlanah SAC ralhrang in an thei ih an thianfai man, tiah Free Fighter Force ih Bo David cun a sim.
Yin Let hi ralhrang dinpitu a si ih ralhrang uknak hngetkhoh dingin hla a sak, zuknung a tuah.
Curuangah mipi ralkap lam cun Yin Let that dingah a inn hmaiah bomb an kamnak a si. Bomb kamtu hi Free Fighter Force le Yangon Poeple’s Defense Force (Bahan) tangrual an si.
Bomb cu Error a piah ih hlaral ihsin control in an puah nan, puak thei lo, tiah Bo David cun a sim.
“Hnawm sar pawl in bomb an hmu ih ralhrang hnenah an sim. Cutin ralhrang in an thianfai. Bomb a puak man lo,” tiah Bo David cun a sim.
Zaithiam Yin Let bomb an puah tum hi tu lawng a si lo ih tu hi a ṭum hnihnak a si.
2021, November thla ahkhan a hmuan sungah kut den bomb ih den a rak tong dah.
Leave a Reply