June 26 ah Bago ramthen nitlaknak, Thayawaddy District, Min Hla peng, Sein Kant Lan ih hmunkhuar SAC ralhrang ke ralkap battalion (ခလရ ၁) le Inma khua ih hmunkhuar battalion 66 cu an sung thu a hnok tuk ruangah SAC ralhrang hotu sang Soe Win in vehvaihnak a nei, tiah ralhrang sung thuthup theih a si.
Kah Lah Yah (1) telin battalion 66 ih ralhrang tam zet cu atufang Karenni ah ral hmaituang in kuat an si ih an hotu lam siseh, an kuttang ralhrang pawl thi le hlo, hriamtuar an tam thawn, thenkhat cu CDM an tuah vivo ruangah tuvekin Soe Win in a vehvainak a si, tiah an sim.
Cu hleiah Kah Lah Yah (1) ih Battalion Commander Lt. Col. Kyaw Zay Yar cu a nupi in a uiresan. An battalion sungih ralhrang pakhat thawn an ngaizawngaw.
A nupi hi Daw Wa Wa Aung a si ih Daw Wa Wa Aung cun a pasal ral ram ah thihter a duh ruangah dawithiam hnenah feh in a pasal huham a nau theinak dangah siatcamnak a tuahter, tiah thuthang a leng. Curuangah hivek thu buai le hla buai a tam tuk ruangah Soe Win ih a va vehvaihnak san a si, tiah an sim fawn.
“June 26 ah Pyay a tlawnnak phah ah a ra lan. Kah Lah Yah (1) ah a riak tiah kan thei. Tu hrawng hi Battalion 66 sungah thuthang siava online ih darh a tam tuk ruangah in ra cekfel si bik ko.
Cun, Battalion 66 sung milai pawl hi Karenni ah an thi tam, CDM lut tla an tam, an zate deuhthaw in an kir nawn lo.
Cu hleiah ralbawi nupi ih thubuai khal a tel ko ding. Zohman sakhan sungah lut in thuhla kan zingzoi ngam lo, daiten kan um,” tiah Kah Lah Yah thawn naihniamaw zet mi pakhatin a rel.
Atu ahcun SAC ralhrang hotu sang Soe Win cu Pyay khawpi ah a thlengsal zo. Battalion 66 ra vehvaitu hi Soe Win a si ko nan, ralhrang thuthang ahcun Southern Regional Commander General Htein Win tiin an than, tiah a rel hrih.
Soe Win ih khualtlawnnak tete pawl hi a hlan ahcun ralhrang thuthang in thaten an ngan ko nan, tuitum cu a thu a dang cuang ih dikten an ngan ngam lo.
Mani cu Yangon-Pyay lamzin tluan le Min Hla peng sungah Security an khohkhah zet ih mipi pawl an cek nasa, tiah theih a si.
Leave a Reply