CDM tuahmi kan si tiah CNA Camp ih a fehtu ralhrang 3 cu an tlanhlo, tiah CCN Team page cun a tarlang.
2022, June 10 ah Chuncung khua an luh laiah kaihmi an si ih thu an suh tikah CDM tuah ih a tlanmi kan si tiah ralhrang pathum cun an sim ruangah CNA Camp ah an hruai hai. CNA Camp an thlen hnuah an tlansuaksal.
An kaihnak thu thawn pehparaw in CCN lamin thu an suh tikah, “Hakha ihsin an thuhla theih a si ih mipi in CDF hnenah an simsawng. Thu an don vekin CDF in an va hawl.
Ralhrang pathum cu ke in an feh lawk ih Haimual Jeep motor an kham ih a parah an kai. CDF in an hmuh tikah an dung ihsin an thlun vivo ih Chuncung khua luhzawngah an kaih haimi a si,” tiah theih a si.
Ralhrang pathum cun an kaih laiah CDM tuah ih ralhrang sakhan suahsan in an relaw. Cutin CDF pawl cun CNA Camp ah an hruai.
Zan khatnak CNA Camp ah an riak ih a zan lala ah an tlanhlo. A tlanhlotu ralhrang pathum cu a zuk tarlangmi hi an si. (Thulaknak:CCN Team).
Leave a Reply