2022 World Cup inntek a si theinak dingah Qatar hnen ihsin nawhthuh la in an bawm, tiah European Parliament Vice Chairman telin mi 4 an kai.
Qatar ram hin ziangtin World Cup thlennak inntek tuanvo a lak thei, timi zingzoinak an neih ih an rinhmaimi pawl thlingthlaknak an nei.
Belgium palik pawl cun December 10 (zarhteni) ahkhan an rinhmaimi European Parliament Vice Chairperson Eva Kaili cu a inn ah an luhhnawh ih sumpai tompi an hmuh hnuah nungcang dik lo le nawhthuh ei thubuai an tuahsak, tiah theih a si.
Qatar ram hin World Cup a thlen theinak dingah Europe ram hruaitu pawl hin Qatar acozah palai pawl hnen ihsin sumpai nawhthuh an la ih an bawm, tiah zum a si.
Himi thu thawn pehparaw in European Parliament sungtel mi 4 kaih an si ih asinan, Eva Kaili ih hmin lawng tarlang a si, tiah The Economic Times cun a ngan.
Kan dungte ahkhan Qatar ih hnatuantu pawl thlengh danglam an si thu ah a lungkimpi thu mipi theih ih a simphuan hnu reilote ah Mrs. Eva Kaili hi an kaihnak a si.
Belgium palik pawl cun Eva Kaili ih umnak inn ah Euro tangka ting ruk an laksak hleiah a phone le computer khal check dingin an kolsak, tiah theih a si.
Leave a Reply