Pyay thuthennak in Chin Pastor le a member 1, kum rei thawngtla dingin daantat

Bago ramthen, Pyay thawnginn ih thuthennak zung cun Chin pastor 1 le a member 1 kum rei thawngtla dingin daan an tat, tiah theih a si.

Pyay peng, ဝက်ထီးကန် khawpi, ကျောက်ကွင်း kawhhran pastor tuantu Matupi pengmi, pastor Aung Myo Win cu  December 8 ah thahrum suah cangvaihnak thapetu thubuai orhter in kum 12 thawngtla dingin daan an tat, tiah amah thawn naihniamaw zet, mi pakhat in a rel.

“Pyay thawnginn ih thuthennak zung cun Chin Pastor cu kum 12 thawngtla dingin daan an tat ih a member mino pakhat ကိုကျော်စွာမိုး khal kum 2 thawngtla dingin daan an tat.

ကိုကျော်စွာမို hi thubuai an orhtermi tak kan theifiang lo. Pastor lawngte thahrum suah cangvaihnak thapetu tiin thubuai an tuahsak,” tiah a sim.

Annih pahnih hi May 3 laiah က်ထီးကန် ihsin Pyay khawpi ah bazaar kai dingin an feh laiah SAC ralhrang in an kai ih Pastor Quarter le biakinn tiangin a zan lala ah an siatsuahsak, tiah theih a si.