Pu Hram Mang le a nupi favon lai ralhrang in an that ih an urkang

February 8, zan nazi 11 hrawngah Kalay peng, Hmandaw khua ih U Hram Mang le a nupi pumsung ih thla 5 favon lai cu SAC ralhrang in an inn ah luhhnawh in an kap that ih an inn copcilh in an urkang, tiah Hmandaw pacang pakhat in Chin Journal hnenah a sim.

“Ziangruangah an that timi kan thei lo. Zan nazi 11 hrawngah an nupa in ralhrang in an kap that ih an inn thawn an urkang,” tiah a sim.

U Hram Mang le a nupi hi ralhrang in an inn sungah kut dunglet ttawn in hmunbur ah vei 15 lai meithal in an kap. A nupi cu ttih le thlaphang in a au nasa, tiah a innhnen pawl in an sim.

Ralhrang ih urkangmi an ruaksa cu an khawmi pawl in an la ih tha zetin an vuiliam.

Hmandaw khua hi inn 300 umnak khaw nuam zet a si nan, 2022 kum thok lam ihsin khawmi pawl an khua an suahsan thluh ih atu ahcun inn 5 lawng an tang, tiah theih a si.