Phun hra camibuai sung le a phi remcang lo pawl phitersal an si ding

Phun hra camibuai ong lotu le a phi remcang lo pawl hrang hmai kum ah camibuai an tuah theisal, tiah SAC ralhrang cun thu an suah.

2022 ih phun hra camibuai a sungtu le a phi ngah remcang lotu pawl cu a ra lai dingmi hnakum ah camibuai tuahtersal an si ding, tiah MRTV cun June 17, zan nazi 8 ah thu a than.

“2022 kum, phun hra camibuai sungtu pawl le thuhla phunphun ruangah camibuai a tuah remcang lotu tlawngta pawl cu 2023 ah netabik vei khat tuahtersal an si ding,” tiah thu an than.

2022 ih tuahmi phun hra cambuai ih old system (စနစ်ဟောင်း) netabik a si ding ih cumi hrangah netabik cambuai 2023 ah tuahsal theih dingin SAC ralhrang cun remruahnak an nei.

2024 ahcun new system ( စနစ်သစ်) in an thlengh ding ruangah 2023 ah camibuai phi tengteng dingin an theihter fawn.

June 17, 2022 ih phun hra camibuai result suakmi ah Myanmar ram pumhuap in 46% an ong, tiah Fimthiamnak tlangbawi zung cun thu an suah.