Phone sungih zuk ruangah ralhrang in Chinnu an kai

Ramleng feh tumtu Mai Van Lawm Par (kum 19) cu Hakha ah SAC ralhrang in an kaih, tiah theih a si.

2022, June 10 sun ah Hakha ihsin Yangon lam pan ih suk motor cu Hakha-Gangaw Checkgate ah an cek ih Mai Van Lawm Par cu a phone sungah ralkap uniform thawn thla a zukmi an hmuh ruangah an kaih, tiah theih a si.

Mai Van Lawm Par hi Thantlang peng, Zahnak Tlang, Dawn khuami a si ih a nu le pa, a unau pawl thawn umkhawm an si, tiah theih a si.

Hi thu thawn pehparaw in Dawn khua upa pakhat cun, “Kan fanute hi phun hra a ong lomi a si. Amah hi ramdang feh tum a si ih a phone sungah ralkap uniform an hmuh ruangah atu vekin an kaihmi a si. A nu hi kum 40 ih upa a si ih mizante ahkhan naute an nei. Ramdang feh tum a si ko,” tiah CNN hnenah a sim.

Mai Van Lawm Par (kum 19) hi Dawn khua ihsin ramdang feh a tum ih zarh khat hlanah atu bangtukin an kaihmi a si.

Cun, CDF nan si, CDF thawn pehtlaihawknak nan nei tiih kaih a tongmi hi nunau 6 lai, kum 19 hnuai palik sakhan ah hrenmi an nei lai, tiah theih a si.