Phone ru an kaihmi tleirawl nute an thlahsal ih soiseltu an tam zet

Tunaite ih Facebook ih lar zet pakhat cu Yangon, Mayangone, Tamyaing (1) veng ih Naing Mobile dawr ah phone ruknak a thlengmi kha a si.

Naing Mobile dawr cun phone rutu thu ah hitin ca an suah.

“Kan dawr ih phone ru kan kaihmi tleirawl pakhat cu zohman in kut kan thlak lo hleiah daan vekin hremnak khal pe loin a nu le pai’ hnenah himdamten kan thlahsal.

Himi hi a nu le pa lamin ngaithiam in dil ruangah kannih lam khalin thinlung thiangten kan thlahnak a si,” tiah an sim.

Thil thlen dan cu July 9 ahkhan Yangon, Mayangone peng, Tamyaing (1) veng, Bayitnaung lamzin (11) ih Naing Mobile phone zuarnak dawr ah phone an ru.

Phone rutu pawl cu veng sung mipi in an hual ih an lakih tleirawl nute pakhat an kai.

Rukru hi mi 3 an si ih dawr ihsin phone 2 an ruk hnuah an tlan. Mipa 2 le nunau 1 an si, tiah theih a si.

Veng sungmi pawl cun nunau tleirawl pakhat an kai ih thuhla an sut. Anih hi kum 19 mite a si. An phone 2 rukmi cu tulai rate in ting 7 lenglo man a si ih an hualnak ah malte a khing siat, tiah theih a si.

Hi phone ru tleirawl an kaihmi cu social media ah a lar nasa ih soiseltu khal an ngah zet.

“A nu le a pa in an sungsuak fa cu lamzin dik khihhmuh in le rualpi tha lo lakah thiarfihlimaw dingin an zirh ding ruangah kan thlah,” tiah Naing Mobile phone dawrneitute cun an thlah.

Atufang hi Yangon khawpi tel in khawpi dangdang ah rukru, suamhmang an tam zet.