Kachin ramkulh, Phakan peng ah mawhnak nei lo mipi pawl SAC ralhrang in bomb a thlak ruangah siatnak rapthlak zet a thlengmi tuarpinak ah Naypyidaw ihkhum 300 tlem sizung ih ralkap sibawi Major Kyaw Phone Myint (ကျော်ဖုန်းမြင့်) cun a Facebook Profile dum a ret ruangah tui’zing ah ralhrang in an kai, tiah ralhrang hruangkulh thuthang ihsin theih a si.
October 23, zan ah KIO din cam kum 62 kim hmuahnak concert an neih laiah SAC ralhrang vanzam in bomb a thlak ih Kachin thiamzung pawl, sumdawng pawl le mipi 80 lenglo an thi.
Hi siatnak rapthlak thlengmi ah ralkap sibawi Kyaw Phone Myint (ကျော်ဖုန်းမြင့်) cun a tuarpizia langter in a Facebook Profile a dumter. Cu hleiah an comment-nak ah Phakan ih siatnak a tuarpi ruangah Profile Picture dumter a si thu in reply a tuah.
Himi ruangah ralkap sibawi ကျော်ဖုန်းမြင့် cu October 25, zinglam ah SAC ralhrang in Naypyidaw sizung ih a um laiah an kai, tiah theih a si.
“NayPyidaw ihkhun 300 tlemnak ralkap sibawi Major ကျော်ဖုန်းမြင့် cu tui zing ah an ra kai. Mipi tam zet thihnak a tuarpizia langternak ah Profile dum a ret ruangah a si. ဖရဲသီး tiin sual puh a si.
SAC ralhrang dinpitu pawl cun ‘that’ ding rori in an nor. Ralhrang hremhmun ah an hruai phawt. Tu-ah a Facebook a hring lerli ih ralring cio uh,” tiah ralhrang hruangkulh thuthang cun Yangon Khit Thit hnenah an sim.
Leave a Reply