Negeria ram, nitlak-thlanglam (Southwestern) ih Catholic biakinn ah biakkhawmnak an neih laiah meithal keng pawl lut in meithal an hmet puak ih puaktheithil dang khal an puah ruangah mi 50 kiangkap an thi dingah an zum thu Negeria thuneitu pawl cun an sim.
Nigeria ram, Ondo ramkulh, St. Francis Catholic biakinn ah zarhpini (June 5) ah biakkhawmnak an nei. Biakinn ih mipi pawl hmuitin in meithal kengtu pawl an lut ih meithal an hmet puak, tiah MP Ogunmolasuyi Oluwole cun a sim.
A thitu lakah nauhak tam zet khal an tel theih a si ih biakkhawmnak tawlreltu puithiam khal an kai, tiah theih a si.
June 5 (zarhpini) hi Pentecost ni a si vekin minung tam zet biakinn ah an pumkhawm.
A thitu pawl hi ziangzat teu an si ti rel fukfi a theih lo nan, mi 50 kiangkap hrawng an si, tiah MP cun a sim. Video ih a lang dan ahcun biakinn sungah hin thisen a li hnenhnen thei.
Hi sual rongbawlnak hi zo ih kuthnu ti khal theih a si hrih lo ih zingzoi rero lai a si.
Negeria ram hi humhimawknak lamah an tlasam zet ti a si nan, tui’ buainak hmun Ondo ramkulh hi Negeria ramsung ah remdaihnak a len biknak ramkulh, tiah theih a si. (VOA).
Leave a Reply