PDF pawl vanduainak cipciar le ralhrang hotu theisuak

Magway ramthen sungih PDF pawl hrang ralthuam phurtu Faw motor cu ralhrang in an rak bawh ih khatlam khatlam kahawknak a suak.

PDF lam hi minung 30 lenglo an si ih Pwint Phyu peng, Mae Zali lilawn ah June 22, zing ah SAC ralhrang in an rak bawh ih an kapaw.

Magway ramthen, Tayet- Kanma Local PDF pawl cu Pakkoku lam ihsin ralthuam phur in an feh ih an thuhla a putsuak ruangah tivekin ralhrang ih rak kahnak an ton thu Pwint Phyu PDF ih tuanvoneitu cun a sim.

“PDF pawl hi zingthlapit nazi 3 hrawngin sakhan pakhat an paltlang. Hi thu an theih ruangah ralhrang in lamzin in an rak bawh a si ko.

Zan nazi 12 hrawng ihsin an rak bawh zo. Mae Zali lilawn luhnak lamah an relh ih a suahnak lamah gate an tuah.

PDF pawl cu motor pahnih in an feh ih hmaisa motor an check rero laiah dungta sawn motor ihsin PDF in an kap hmaisa. Khatlam khatlam kahawknak a thleng.

Ralhrang lam cun RPG hmang in in kah tikah motor parih ralthuam puak thei pawl an puak. Curuangah kannih lam mi 12 an thihnak a si ih mi 3 hriamhma roh zet an tuar. Hriamtuar mi 3 an kai fawn,” tiah PDF hotu cun a sim.

Hi kahawknak ah PDF lam minung 14 cu ralthuam 30 le meithal 6 hrawng la in an tlansuak thei. Ralthuam hi 20 hrawng ralhrang kut ah a thleng, tiah theih a si.

“Kan ram hrangah PDF pawl in nasa zetin kan zuam ih kan nau le pawl khal mai’ khua le ram kilkhawinak hrangah ralthuam an thiar.

Cumi laiah thuthang a putsuak ih vanduai kan tong hi thin a na tuk lawmmam,” tiah Magway ramthen ih PDF hotu pakhat cun a sim.

SAC ralhrang ih biakawknak thirhri ahcun PDF pawl rak bawh ih hohatu bik hi captain Min Paing Soe a si, tiah theih a si.

PDF 12 an thi ih hriamtuar 3 an kai. Ralthuam 25 an laksak hleiah 19 cu a siat. 40 MM bomb den phun (grenade laucher) pakhat khal a siat.

Himi thu ah BBC Burmese cun hitin a ngan.

PDF pawl ih fehnak lamzin hi an uknak hmun a si. Curuangah zalen zetin ralthuam an phurh ngamnak a si. Asinan SAC ralhrang cun thuhla an rak theih ruangah an rak bawh ih an kap.

NUG Defense Ministry zung khalin Sagaing le Magway lamzin 90% cu kan uk thei zo, tiah June 21 ah an sim.

Hmanseh Pwint Phyu peng, Mae Zali lilawn ngelcel hi PDF pawl ih uknak hmun a si lo ruangah ralhrang in an rak nuai theinak a si, tiah BBC cun a tarlang.

Cuhleiah ralthuam an phurhlut ding thu SAC ralhrang lamin an theih ruangah an rak bawh, tiah a ngan hrih.

SAC ralhrang lam cun Telegram ah Pwint Phyu peng, PDF pawl thawn doawknak a suak ih ralthuam an laksak thu le PDF mithi ruak pawl ih zuk thawn an tarlang.