“Mai biakmi phungki pawl thattu PDF pawl ih thluak ah Buddhhism thukham 5 (The five precepts) khal a um nawn lo, Daw Aung San Suu Kyi lawnglawng an ruahnak thluak ah a um, tiah Bolet Hla Swe cun a sim.
Phungki pawl thattu PDF pawl ih an thluak ah pathian thu um loin Daw Aung San Suu Kyi lawnglawngin hmun a khuar thluh, tiah Bolet Hla Swe cun ralhrang media pakhat ih interview-nak ah a sim.
PDF pawl cun Gangaw ram ih acozah pinsin pawl, USDP party mi le sa le phungki pawl an that nasa ih cumi rehter dingin ralkap in an va kap ih an tlanhlo thluh, tiah PDF pawl zokzet zetin a sim.
“An thluak ah pathian thu hrimhrim a um nawn lo. Pathian khal an nei lo. Thutak khal an pai nawn lo. Phungki siseh, nu le pa, saya ti khal an thleidang nawn lo. An thluak ahhin pathian thu le Suu Kyi thu an thlakthleng ṭheh zo, An thluak ah Buddhist thurin khal a um nawn lo ih Daw Aung San Suu Kyi rit in an ri,” tiah a sim hrih.
Hiti simtu Bolet Hla Swe hi Gangaw hrilfung zuamawknak ah Amyotha Hluttaw palai a si laiah Daw Aung San Suu Kyi pavua laksawng pe dahtu a si.
Anih hi a ṭong a uak thei zetih media ih interview an neih ṭum khalah, “Gangaw PDF 300 lai cu ralkap 15 hrawngin an va dawi ṭek thluh. PDF 7 an thi bet,” tiah PDF pawl nautat zetin a sim.
Asinan amah cu PDF thawn an tonawk caan ah ralṭha zetin USDP dinpitu tiin a rel ngamaw lo ih CDM tlawng uktu ka si, tiin thuphan a per.
Bolet Hla Swe hi tlangpar hriamhrei kai pawl remdaihnak thurel dingih sawm an si laiah anih cun, “Sui kut in cibai dingin kan hmuak ding. Asinan an duh lo asile meithal in kan hmuak ding,” tiah Hluttaw sung rori ah reltu a si.
Anih hi Gangaw peng ah USDP in Amyotha Hluttaw palai hlun rak ṭuan dahtu a si ih ralkap bawi pinsin latu khal a si.
Leave a Reply