Wetlet peng ih hrambun GZ Special Task Force-Wetlet ih ralkap 7 le tualsungmi 7 cu Shwebo District Battalion 2 in an kai ih Circuit ပကဖ ih fialnak vekin kai an si thu Special Task Force-Wetlet ih tuanvoneitu in a sim.
GZ Special Task Force ih ralkap 7 hi khualtlawng in khawte pakhat an thlennak ah NUG ih kuttang Shwebo District Battalion 2 in an kai. February 18 zing ah kai an si ih atu dinhmun ah Wetlet senpi humhimnak pawlkom (ပလ ဖ) zung ah an hreng ih an kaihnak san bik theih a si lo, tiah Special Task Force-Wetlet ih tuanvoneitu cun a sim.
“A hlan khalah kan milai in kaihsak dah zo. Raldo thu ah siseh, ramthukhel thu ah siseh buainak kan nei dah lo. Atui’ an kaihmi lakah tualsungmi tla an tel tikah a runsuah hna cu kan tuanvo ah a cang,” tiah GZ Special Task Force ih tuanvoneitu Ko GZ cun a sim.
Hi kaihkhih thu thawn pehparaw in CJ Platform in a suhhlam tikah Shwebo District Battalion 2 lam cun Circuit ပကဖ ih kaihmi a si thu le senpi humhimnak ralkap( ပလဖ) sungtel pakhat kah a si ruangah thuhla suh duh ruangih kaih an si thu an rel.
Hitawk hrawnghrang hi PDF bu khat le bu khat kaihawk an hmang zet ih kan dungte ah Special Task Force-Wetlet ih sungtel an kaihsak dah zo.
“A hlanah ka khualtlawn sungah ka nau le 9 in rak kaihsak. An kaihnak san bik cu khawte senpi uknak (ပကဖ) thawn buaibainak an nei tiin an kai. Thla khat sung kan tawlrel nan, an suah duh nawn lo,” tiah Ko GZ cun a sim hrih.
Himi thu thawn pehparaw in NUG Defense Ministry zung ih U Naing Htoo Aung biak asinan, zianghman a lehkhirh lo.
Nikum August thla khalah Wetlet peng sungih hrambun Bo ကျားကြီး homi PDF bu khat cu NUG kuttang ih Wetlet peng ပကဖ in kai dingin an siim tikah khatlam khatlam kahawknak a suak ih Bo ကျားကြီး ih nau le pahnih an thih phah, tiah theih a si.
Leave a Reply