Ye-Dawei lamzin ah tualsungmi pawl ih tomi phungki motor an kah sual ruangah a thimi le hriamhma ngahtu pawl parah ngaithiam dilnak YPPDF in February 8 ah thu an suah.
February 6 sun ah, ရာဖူး khua phungki tlawng ihsin phungki motor cu Dawei lam pan ih a feh laiah lamzin kelah tualsung hriamhrei kai pawl in an kap sual ih phungki bawi ဦးဥက္ကဋ္ဌ le ဒေါ်အုန်းမြ an thi ih mi 6 hnakih tam in hriamhma an tuar, tiah theih a si.
Himi ni ngelcel hi ကလိန်အောင် khawpi ihsin ရေဖြူ khawpi ih ralhrang sakhan ah ralhrang rual sinfen menmen hruh in an ra ding, ti an theih ruangah PDF in an rak bawh ih mine an puah.
Ralhrang rual pawl ih tomi motor pahnih karlakah phungki bawi motor a theraw ih cutin PDF pawl in theithiam loin an rak kah pangmi a si, tiah YPPDF ih tuanvoneitu in a sim.
Mine an puah ngah hnu lawngah motor ahhin phungki bawi le tualsungmi an to ti an theih fang thu a rel fawn.
Mithi le hriamhma ngah pawl khal tuamhlawm an duh zet nan, harsatnak phunphun ruangah sizung ah an feh ngam lo thu le phone ihsin ngaithiam dilnak le tuarpinak an sim thu, YPPDF ih tuanvoneitu cun a sim.
YPPDF cun lehhnu hrimhrim ah tuvekin an cangsual nawn lo ding thu, mipi lam khalin an dinhmun theihthiamsak in dothlengnak a cemnet tiang dinpi dingah zangfah dilnak an nei.
Leave a Reply