Sagaing ramthen, Monywa peng, Naga khua ah mopuai an hman rero laiah monu le mopa le an rualpi 1 cu PDF an si, tiin SAC ralhrang tirhfung Pyu Saw Htee le ralhrang in an ra kai, tiah tualsungmi pawl in an sim.
Mopuai hi July 11 ih tuah an si ih ralhrang le Pyu Saw Htee pawl cun mopuai hmangtu pawl cu an vua an vel, tiah theih a si.
“Hi kiangkap hi Pyu Saw Htee pawl ih thazang cahnak khua a si. Kan theih dan vek asile phungki pakhat in Pyu Saw Htee pawl a hei sim. PDF ralkap pakhat nupi nei in khua ah a ra tlung, tiah phungki in a hek.
Pyu Saw Htee le ralhrang cu a rualrual in motor le bike in an ra ih mopuai hmannak mandat pawl khal an siat thluh.
Khuami pawl in an rak kham nan, umzia a nei lo. Nupi neitu hi ‘PDF’ tiin an kai ih an vua an vel. Cutikah zohman then ngamtu khal kan um nawn lo,” tiah khuami pakhat cun a sim.
Himi thu thawn pehparaw in SAC ralhrang lam cun PDF hotu Ko Win Myo nupi a nei ding, tiin thuthang an theih ih an ra kaih thu theih a si.
PDF hotu Ko Win Myo le a nupi (monu) Ma Thet Mon Yayar le U Myint Maung tei’ pathum cu tual ser meithal pakhat thawn kan kai, tiah ralhrang lam cun thu an suah.
Leave a Reply