PDF hotu cu mi a zum ol tuk ruangah a mikhual 2 in an that

Sagaing ramthen, Yinmapyin peng PDF hotu Bo Kalone cu zo ti theih lo hreiamhrei kai in June 27 zan ah an kap that.

Bo Kalone hi India sersuahmi 9MM cerek in an inn sangka rori ah an kap that, tiah an sim.

June 28 ah Bo Kalone ih ruak cu meisa in ur a si nan, thuhla fiangfai cu amah hngilhlonak lungphun an phun lawngah thusuah an tuah ding thu Yinmapyin PDF ih tuanvoneitu cun a sim.

“Mizan (June 27) ah Bo Kalone cu Kyaukmaw lamah a feh. A ra kirsal lamah mi 2 a run hruai. Bo Kalone cu anmai’ inn ah a tlung ih a mikhual pahnih cu sakhan ah riak dingin tawlrel an si,” tiah a sim.

Bo Kalone thah a si hnuah a mikhual pahnih cu sakhan le khawsung khalah hmuh ding an um nawn lo. An sulhnu zoihnit an theih lo ih boot kedam pakhat lawng hmuh ding a um, tiah Yinmapyin PDF tuanvoneitu cun a sim.

“Bo Kalone hi mi a zum ol tuk a bang! Mikhual pahnih khal lamzin ah a sarmi an si ih amah rori in sakhan ah a rak hruai. Khua le sakhan hi bike in minute 20 hrawng feh a si,” tiah a sim.