PDF bur khatin khatlam PDF sungtel 10 an kai

Hmunram longaw in PDF bur khat in PDF bur dang an kai.

Shwebo District PDF (2) Battalion cun Watlet peng, nisuahnak ih hmunkhuar GZ Special Task Force-Watlet sungtel 10 cu December 19 ah ralthuam keng in an ra kai, tiah GZ Special Task Force-Watlet tanrualpi ralkap pakhat in a sim.

“Shwebo District PDF (2) Battalion in, December 15 laiah GZ Special Task Force-Watlet hmunkhuarnak cu kanmai ram a si, ni thum sungah hmundang ih nan tthawn a tul, tiah an sim.

Shwebo District PDF (2) Battalion ih an hotu bik hi  ဒူဂျွန်စိုင်းသူ tiih kawhmi KIA ralkap a si. Anih cun GZ Special Task Force-Watlet hotu ကိုချစ်ဦးမောင် le ကိုချစ်သဲမောင် hnenah an umnak suahsan dingin a cah hai. Hihi sullam um lo tukmi a si.

PDF bur khat le bur khat parah hmuhsuamawknak rori a si,” tiah GZ Special Task Force-Watlet tanrualpi ralkap pakhat in a sim.

GZ Special Task Force-Watlet hi dothlengnak thok pekte a si lai ihsin tui’ an umnak ah bukhuar cia an si thu an hotu Ko GZ in a sim.

“Dothlengnak a thok pekte laiah tui’ kan umnak Watlet nisuahnak ah hmun kan rak khuar zo. Cumi hnuah Battalion tivek a hung suak fang.

A hlanah cun Local PDF tete in kan ding. Ka um lo sungah nau le pawl an ra kai ih an thlaphang zet.

A ngaingaite cun an kuttang ih umter in duh a si bik,” tiah Ko GZ in a sim.

Myanmar ramsung dothleng caan a rei thlang tikah SAC ralhrang dotu tualsung hriamhrei kai pawlkom pakhat le pakhat karlakah hmuhthiam loawknak a suak phahphah theih ding a um hnuaihni thlang.