1. Na pasal sungkhat duhdawt aw: Na pasal cu na duhdawt ih na neih zo a si ruangah duhdawt bet ciamco ding a um lo, cuti ti tikah huat ding tinak a si cuang lo.
A thupi sawn cu ‘mo’ tiih a lo kotu na pasal sungkhat pawl na pasal na duhdawtnak an parah langter aw. An lo iai zet a si hmanah nang cun duhdawtnak in airul awla ni khatkhat ah na hmin a ṭha leh ding.
2. Mo thar tukin um hlah: Na lawinak inn ah mo thar/mi thar tuk vekin um hlah. Tlangnel zet, biak nuam zet le kom nuam zetin um zuam aw. Na duhhai rel ngam awla, an lo hmaisong lonak dingin an mamawhmi sut aw. Na mizia khal thup duh tuk hlah la, ziangahtile khua a rei tikah an lo thei leh thotho ding.
3. Thih ṭian tiang: ‘Innsang din ṭhat lo tlukih ṭhiah leh harsa a um lo’ ti thei in, vei khat na neihmi pasal kha thih ṭian ih ṭianaw tiangin lungphum in nei aw. Ziangvekih harsatnak a ra thlen hmanah beidong loin cui’ harsatnak cu innsang siatbaltu a si ding hnakin neh tum aw.
4. Ṭhenṭhektu si loin remkhawmtu: Mi inn ih lawi Mo na sinak thei ringring in na lawinak innsang ṭhenṭhektu men si loin remkhawmtu lam si zuam aw. Na pasal tei’ sung nangmah ruangah buai hlah hai sehla nangmah zarah remnak nei hai seh.
5. Inntlei rot hlah: Na pasal sungkua na hmuh thei lo menah inntlei rot aw hlah. Na pasal lamin ṭha le rem an ti hnu lawngah lungawi in cohlang men aw. Cuti si lo ih nangmah in inntlei na rot leuhleuh asile ‘mo sual’ tiah hmin na pu ding.
6. Na nu le pa tei’ inn len ngaina tuk hlah: Na pasal hnaṭuan sungah maw, na pasal a um lo ziarzo veten na nu tei’ inn lawnglawngah va rol hlah. Na pasal in ‘ka pi tei’ inn ah leng sehla’ a lo ti hmanah el ṭheu lam aw. Na nu tei’ inn lawnglawngih niṭung na rau asile na pasal sungkhat lam ziangah na siarlo tinak a si ih annih khalin mak ah an lo thun ve lo ding.
7. Zualkawh hmang tuk hlah: Na pasal thawn simaw, a sungkhat thawn thukam elawknak nan neih pang asile tla le pai men aw. Venghnen hmuanthlang, hmuansak ah zualko aw hlah. A hleice in na nu le pa hrimhrim na sim lo a ṭha. Mi hnenih zual na kawh tam asile na hmin ah, ‘mo tawtawrawt’ an lo ti pang ding!
8. Dunglam sa barh hmang hlah: Na pasal le a sungte pawl theih loin nangmai lamah thil pek uar hlah. Nangmai’ lam na seherh caan a um asile na pasal lole a sungkhat pawl thuron awla ‘mo ṭha’ na si ding ih annih khalin an lo el siang ding ka zum lo. Khat le khat thuronawk derhdo a tluang bik. Cuti si lo ih a thuptei’ ‘dunglam sa barh’ na cin tuk asile na hmin a se ding.
9. Na pasal na duhzia langter aw: Nangmai sungkhat lam mithmuh le theihhngan ah na pasal na duhzia langter aw. Nan nupa le nangmai’ lam tonawk caan, rawl eikhawm caan tivekah na pasal hngilh khopin um hlah la, an mithmuh rori ah na pasal ngaihsak thiam aw.
10. Pathian theihnak: Ziangkim hi Pathian tel lo cun a famkim lo ti kha na theihhngilh lo hram pei. Innsang din timi cu a tluang zurzo dah kel lo. Fala le tlangval lai vekin duhawk hliaphliap theih lo caan a um. Harsat caan, beidong caan, zatlak caan khalah nupa nun thlahthlam loin Pathian hmaiah thlacamnak thawn hlan ringring aw.
Leave a Reply