SAC ralhrang kuttang ih palik nunau pakhat (rank Deputy Sergeant) cu June 2 ah Karenni Democratic Front (KDF) hnenah a tlanlut, tiah theih a si.
Shan ramkulh, Pinlaung palik sakhan ih Deputy Sergeant tuantu a si ih Thalno dothlengnak thok pekte laiah KDF hnenah tlanlut dingin rak zuamtu a si. Asinan remcan lonak ruangah a hlawhtling thei lo.
“Humhimnak hrangah harsa zetin an sakhan a tlansan. A thuptei’ tlansuak a si vekin kan tiamawknak hmunah kan va hmuak lohli. Palik suahsan a tumnak hi a rei zet zo. Dothleng thok pekte in a si. Zohman pehtlaih ding a neih lo ruangah a rei phahnak a si. Karlakah palai thlah in kan tawlrel,” tiah KDF ih tuanvoneitu cun a sim.
Deputy Sergeant nu cu thla khat sung a umdan zohfelnak neih hnuah amai’ lungkimnak in a tuah duhmi a tuah thei, tiah a sim hrih.
Palik nunau hi kum 25 mi, Pinlaung palik sakhan ah rittheih lam dotu palik Deputy Sergeant a si ih Ma Victoria a si. Shan ramkulh, Hpekone peng ih Karenni nunau a si.
KDF hnenih tlanlutu palik hi Deputy Sergeant Ma Victoria telin mi 4 an si zo. Meithal thawn tlanluttu pawl cu tangka ting 50 an rak pe theu.
Leave a Reply