Shan ramkulh saklam Tachileik ah um in Thailand ih motor, bike le thilri pawl cahsak theutu mi pakhat cun bike leisak dingin Thai Baht tingkhat a la ih a bum lanta, tiah theih a si.
June 8, sun nazi 12 hrawngah R T timi kum 26 mi hnenah Thai Baht tingkhat pek a si ih simlamah pehtlaih theih nawn loin a hlo reprep, tiah sumpai petu in a sim.
“Zianghman pehtlaih a theih nawn lo. Nazi 4 tiang cu kan be thei lai. Zan a si tikah a online nawn lo. A Facebook account khal a siatter zo. Tik Tok khalah a zuk pawl a thlengh thluh. Friend list khal a phit. Viber ih a post mi zuk pawl khal a thlengh thluh,” tiah a bum tuartu cun a sim.
A bum zat Thai Baht tingkhat a si ih Myanmar tangka in ting 60 kiangkap a si.
“Thai Baht tingkhat cu tulai boruak ah a tam zet. Ziangtin kan tawlrel vivo ding ti khal kan thei lo. A umnak le a suahnak khua le kan thei lo. Tachileik ah commission tuan in a um ti lawng kan thei. Motor, bike le thilri a leisak theu. Minung khal ral khatah a kuat thotho,” tiah a sim hrih.
Kan dung March thla lai khalah Lashio ih mipa pakhat Page Follwer tingkhat lenglo neitu cu Shwe Myawaddy Honda Showroom ah hi pa thotho in ting 20 a bum zo, tiah theih vivo a si.
Shan ram ahhin online ihsin sumpai bumawk a tam zet. Hriamkai pawlkom hmin suangin sumpai dilawknak, rukruknak le suamhmang cangvaihnak tivek pawl a luar zet.
Leave a Reply