Nupinu le mino tete pawl beidongnak ruangah rittheih sivai an hmang ciamco

Kachin ramkulh, Myitkyina le Mogaung lamzin tluanih khawte thenkhat pawl ah nupinu le nauhak kum kim lo pawl rittheih sivai an hmang zet, tiah theih a si.

Pulhhri le ram buai hnuah WY sivai le bing rang an tham nasa ih nunau kum 20-30 karlak pasal nei zo le nauhak kum 13 tlun pitling hrih lo pawl in luar zetin an hmang, tiah The 74 media cun a sim.

“Nupinu thenkhat cu innsang lam buainak ruangah beidong in an tham. Thenkhat cu an pasal pawl rittheih sivai an hman ruangah an rak hmang ve.

Hrekkhat nunau cu pakhatin a hman hnuah midang a zirh sawng vivo ih komawknak le nomnak ah an hmang vivo.

Tu-ahcun hi pawl hi kham an theih nawn lo. Nauhak an si le kum 13 cin cun thathawhnak sivai hlum sen WY timi an ei hai.

Nauhak pawl hi biakinn khawmnak an khar ih tlawng le an kai lo tikah umharphen ah thil si lolo an tham a si bik,” tiah khuami pakhat cun a rel.

Myitkyina-Shwebo-Mandalay Pyitaungsuh lamzinpi tluanih khua Sha Daung, A Chi, Mayang, Gashian Yang khua pawl ah nupinu le nauhak rittheih sivai tham an tam ce, tiah theih a si.

Hi pawl pawl ih an eihawlnak bik cu ran zuat le thlaicin bik a si ih ritheih sivai an tham tuk ruangah caw, na, hanghnah hangrah le thirsia tiangin an ru ih an zuar hnuah rittheih sivai leinak ah an hmang, tiah Mayang khawlal in a sim.

Innsangnu bik a pasal dungthlun in rittheih sivai a tham ve ruangah fanau hrangah an hmaikhua a pit zet thu kawhhran pastor pakhat cun a sim.

“WY sivai an ei tikah an thinlung a feh sual ih an mit latu thil ta poh fir vivo an tum. Innsangnu le pa bik hiti an si tikah an fate pawl ngaihtuah an um tuk,” tiah a sim.

Ache khua ahcun rittheih sivai hi inn rori ah an ra zuar ih mi pakhatin khawdang khalah bike in a zuar vivo, tiah khawlal in a sim.

Hi khua ahhin thla khatah rukru thubuai 15 a um ih khawnu khawpa le pastor pawl in lairelnak an neihsak theu.

2014 mipum siarnak vek asile Myintkyna peng Sha Daung ah inn 391 le mipum2435 an um ih mi 1000 hrawngin rittheih sivai an hmang, tiah theih a si.

Ache ah inn 471, mipum 2328, Mogaung peng, Mayang khua ah inn 627, mipum 3535 hrawng an um.

Tarlangmi khua mipum cazin ih then thum then khat hin rittheih sivai an hmang, tiah The 74 Media cun a sim.