Nupi/pasal tong hrih lo pawl ih ṭih bikmi (10)

1. An kum zat theihsak-Leng u, val u pawl hin an kum suh an hua zet lawng si loin an tih zet fawn.

Cu hleiah a tlangpithu in an kum khal thitha in an rel duh lo ih an thum deuh tlangpi. Facebook khalah an suah ni le thla an ret dik hmanah an suah kum cu a mal bik kum nga tal an thum deuh tlangpi.

2. Mopuai feh an hiar lemlo-Sungkhat neiaw an um caan ah feh ding an huphurh zet.

A san cu a neiawtu pawl hi a tlangpithu in an hnakin kum nauhak an si tikah an hmaisong ciamco.

Cun, mipi in, ‘Nang teh na nei thlang lo ding sawm?’ tivek ih thusuh a um theu ruangah mopuai an feh hiarhal lemlo.

3. Capoh an dawl lo-Leng u le val u pawl hin capoh an ngaih tuk lo.

‘Tu tiangtiang nupi/pasal nei lo cu na tong lo thlurthlo mawsi?’ ti pang tla cun mi talhthat an man.

A zei deuh pawl cun, ‘Duhtu ka nei tam tuk nan, keimah in ka duh lo,’ tiah mi an phit men.

Girl washing in streams, sexy

4. An laklawh-Sungkhat lole rualpi lakah laklawh zetin caan an hmang.

Titi nuam rel vek khalah an thuhla rel pang an phang ih a relh in an relh theu.

An hnakih nauhak lakah tlanlen nuam an ti vek nan, mawihmang an ti lo lala.

5. An ngaih lomi tongkam-Val u an si le ‘nang hi na pa thei lo (tuai) mawsi na si?’ tivek tongkam an hrangah a kha fualfo.

Leng u an si le ‘na mit a sang tuk ih cunah si hi pasal na ton thei lo, mai phutawk theithiam aw,’ tivek tongkam an theih cun an sunglam a cik zulzo si ko.

6. Dem an duh lo lala-Anmai kum thawi milaw ciah mi nikhua lo deuh, zangbeng deuh tivek khi dem sual pang ahcun an thinheng a ling in a ling.

Leng u an si le ‘khawlu ih khimi pa khi nei men awla’ tiin dem sehla an duhlozawng a si phei cun tah lai an nuam.

7. Nupi pasal neih ding an tih-Kum a upat cun lung a fim deuhdeuh ih mi nupa nun le a si lozawng hlirin an hmuh tikah nupi/pasal neih ve ding an tih ih an khurh thlohthlo si ko.

Nau nawi pom vek an hmuh le phei cun an daw vek nan, ‘nupi/pasal nei sehla ziangtin khua kan sa ding, ti an ngaihtuahnak ah caan a liam vivo.

8. Minung an tih-Val u hin a tlangpithu in nupi nei hrih lo an si ahcun nunau ta poh an tih vivo.

A hleice in fala kiangih um, fala taksa thawi hnorhmetawk hi a tak a za ih an kam a sur.

Curuangah hlaral in fala zoh hi an duhtawk men theu, an kiangnai ih um cu a zarhtluk ah an ruat thlang.

Leng u khal cu thotho, tikcu le caan a rei cun mipa an tih deuhdeuh. Mipa in malte an taksa dai pang sehla a rak in an rak.

9. Nuthlawi/pathlawi si an tih-Nupi/pasal nei ih thlawi cu a zia deuh lai.

Vei khat hman nupi/pasal nei hrih lo khalin ‘thlawi’ an tih cu teh! Himi nu/pa nei bang sehla thenawk leh pang nungla ziangtin? tivek men zanvar an ruat thei.

Thil ziangkim hi a sezawng deuh in an fehpi a bang!

10. Thih an tih-Zo cio khalin thih cu kan tih theh ko. Asinan leng u, val u pawl hin thih ding an tih hleice.

Fate rung pangvai ding ti zawngin ruah ding an nei lo nan, nupi/pasal, fanau hlawmtu nei lo ngaingai ih vung cem muarmo ding cu a ruat khal an ruat ngam lo.

Be the first to comment

Leave a Reply

Your email address will not be published.


*