Nupi khaw-tlan a hruainak ah Pa Pau Lian Mang cu a nupi sungkhat in an rak that

Chin ramkulh, Teddim peng, Kaptel khua ah Pa Pau Lian Mang cu a nupi sungkhat in kut an thlak ih a thi, tiah theih a si.

Pa Pau Lian Mang hi a nupi thawn fate tla an nei nan, nupa karlak tithiam loawknak ruangah a nupi cu a fate thawn khua a tlan, tiah an sim.

Curuangah February 21 ah a nupi khaw-tlan hruai dingin Pa Pau Lian Mang cu a pu-tei’ inn ah a va feh ih thukam elaw in an rak thawi that, tiah mit ih hmutu pawl in an rel.

Annih nupa hi cutluk lawmmam ih nupa buai tuk an si dah lo nan, tithiamawk lo caan tete cu an nei ve ko, tiah an innhnen pawl in an sim.

Asinan a nupi sungkhat lam cun an fanu hi Pau Lian Mang thawn nupa si dingah an lungkim thei lo, tiah tualsungmi pawl hnen ihsin theih a si.

Pa Pau Lian Mang in a nupi hruai a tum ni khalah a pu rori in, “hi pa hi that men uh,” a ti ruangah mipa 3 in an velh bor ciamco ih a thi, tiah tualsung thuthang in an tarlang.

Hi laithat thubuai cu Lai daanten vok pakhat le fangfai dip khat in remnak an tuah thei zo, tiah theih a si.