Nupa milaw hnakin milaw lo karlakah duhdawtnak a fek sawn

Nupa tuak lakah ‘an va kaihaw lo ee’ timi kan nei ruri ding. Nupi ruangrai ṭha zet, hmel khal zahpium loih piangpir zet a si laiah a pasal cu zubui vek lu hlawn belbel, niam karkite a si.

Cun, pasal sawn khan ṭha zet, hmel khal piang veuveu a si ih nunau hmuahhmuh ih zoh thlunmi rori cun nupi cikte, bokbawn nawn rah men bangih ping er-ite a nei lala.

Mipa sang viangviang in nupi tawi teuti an nei. Nunau tlam zerzer in pasal tawi belhbite an nei lala.

A cangah cun hi pawl hi zoh tla an nuam linglet. An milawk lo tuknak in duhnunnakte an nei, ‘iang’ an nei ve cu teh. Khatlamah nupa Romantic tak vekin an lang riangri.

Ruangrai dawh le dawh lo, hmel sia le ṭha, vun rong bangaw lo, rawicok ruri ih neihawk hin ṭhatnak lai a um ve, tiah mithiam pawl cun an sim.

Cun, zirnak thiamnak ih sinak bangaw lo, thlauaw tuk neiaw an um lala. Ruangrai le hmel cu ret ṭha hrih in milai ih nitin kan mamawhmi zirthiamnak lam khalih sinak thlauaw tuk neiaw an um fawn.

Nupa nun zirtu pawl cun mipa le nunau milaw lo tuk neiaw pawl hi an ṭhenaw har cuang. An nupa nun khal a hnget sawn an ti. Mipa le nunau tuak veve, hmel mawi veve, sinak canaw veve pawl lakah 65% ṭhenawknak a suah laiah nupa milaw lo tuk pawl cu 15% an henaw fang, ti a si.

Ziangruangahtile nupa kaihaw tuk pawl cu anmah le tawkah hngalnak, puarthaunak le duhawknak an nei veve.

An dinhmun a bangawk tuk ruangah dokalhaw nain an khawsa. Nu lole pa talin a hnuaiah kun keng, an ti duh lo veve ih thuneitu si an cuhaw.

‘Ka mawi, ka tawk, ka famkim’ timi lungput thawn an pasal/nupi an pehtlaih ih an sualpalhnak zawnah thusim an theih lo.

Zirnak le sinak an canawk tikah sumpai lakluh thei dan a nu, a pa in a bangaw. Cucun nupa lakah lu bik sinak an zuamaw ko. Hi ruangah nupa tampi an ṭhenawk phahnak a si.

Asinan, nupa lakah sinak thlauaw, ruangrai le hmuihmel bangaw lo pawl cu an karlak pehtlaihawknak a him sawn riangri.

Ziangahtile a cuangmuar deuhtu in a nupi/pasal kha do timah a tim lo. Midang in in lonsak ding, ti phangin tikcu a hmang lo ih a nun a hahdam.

A nasa lo sawntu khalin duhawknak, puarthaunak zianghman amah ah a um lo tikah thukam elawk a um ve lo. Amah hnakih nasa sawn a nupi/pasal zai a ngai men. Cutin an nupa nun cu a hngetkhoh.

Himi hi nupa nun zir pawl ih an hmuhsuah dan a si.