Veitnam ram ih duhnungza le hnuk ulhtertu innsang khat cu Hoa Binh Park, Hanoi ih an veivah lai cameraman Minh Khuong Luu in a rak zuk ih social media ah a thlah tikah mipi thinlung a neh zet.
Milai tahnak ah kutke kim lo nupa an si nan, an duhdawtawkzia le an innsang khawsat tlanlen dan hi mi thinlung a luah ih zangfahtu khal an ngah zet.
Innsangpa Ngoc Bao Doan hi vui ke nat (elephantiasis) a neih ruangah a ke kehlam tan a si ih ke lemte thawn a feh. A hnatuan bik hi photographer a si. A nupi Le Thu Thi Nguyen khal kum 10 mite a si laiah lei laihnak cet ah a ke a hrolh sual ih a ke vorhlam a hloh ve.
An nupa hin ke khatlam veve an nei nawn lo nan, an hringnun zalam ah hlawhsam an tum lo.
Ngoc Bao Doan hi marathon tlan zuamawknak ah a tel, tidai leuh le zanthing par kai tivek lehpannak tinkim ah a tel vivo.
Annih pahnih hi Facebook ihsin theiaw an si ih Ngoc Bao Doan ih zuk a post theumi pawl Le Thu Thi Nguyen in rak zoh theu ih an uaraw cih.
Cutin 2020, March 12 ah innsang an din ih November17 ah fapa duhnung zet Minh Tri Doan timi an nei.
An nupa hin ke khatlam veve nei lo an si vekin an fate zohkhennak ah harsatnak tete cu an nei ko nan, tha thlah riai loin innsang hngetkhoh zetin an din thei.
“Kan fapate hi kannih hrangah harhdamnak sivai a si. Kan lungawinak umsun a si. Amah ruangah phur zetin hna kan tuan thei ih kan hringnun ih thazang rori a si,” tiah Le Thu Thi Nguyen cun a sim.
Leave a Reply