Nunau hi ngaizawng thawn an ṭhenawk hnuah an mawi deuhdeuh

Nunau/fala pawl hi ngaizawng thawn an ṭhenawk hnuah an mawi deuhdeuh, tiah an sim ṭheu.

A ngaingaite cun ngaizawng an neih laiah an mawi lo a si lo nan, an ngaizawng thu hnuaiah an kun ringring ruangah an mawinak/ṭhatnak an rak thup sawn.

Atu-ahcun zohman dipdaltu an um nawn lo tikah an mawinak le ṭhatnak cu pangpar bangin a mum, a parh ih mawi zetin an par thei thlang.

Taksa: Ngaizawng thawn ṭhenawk pekte ahcun an tuar ih an taksa a zinfe duahdo. Mi thau deuh hman khi mi ṭawl ah an cang thei.

A taktak ahcun ngaizawng thawn an ṭhenawk ih an nun kekkuainak ruangah an taksa ṭumṭawl khi model mawi zetah an suah phah thei sawn.

Ngaizawng thawn ṭhenawk hlan, pian nei mumal lo khal ngaizawng thawn an ṭhenawk hnu cun pian mawi zet, model rori ah an suak.

Thinlung: Ngaizawng thawn boruak ṭhat laiah cun thinhar zetin caan an hmang. Ka tlangval in i iai pei maw? I ṭhen men pei maw? A duhlozawng le a duhzawng ziang a si? timi rori ruat in caan an hman ruangah an thinlung khawruahnak a bang hluahhlo.

Ngaizawng thawn ṭhenawk hnuah cun malte cu an thinlung in a tuar lawk nan, reipi an tuar paih lo.

Thinlung zalen, khawruahnak thiang in an leng ih ngaizawng hlun khal mitmei ven ṭul nawn loin zangkhai zetin caan an hmang.

Kan taksa damnak sivai ṭha bik cu thinlung a si vekin an thinlung a hahdam ih an taksa khal a dam verver. Cutin a nini in an mawi deuhdeuh.

Ceiawknak: Nunau pawl cu ngaizawng an neih laiah an duh vekin an ceiaw ngam lo. Ziangahtile an tlangval ih iai le ler tiih ṭhen an phang.

Tlangval strick an neih tla cun ‘na sam zuah aw’ ‘himi hnipuan hruh hlah’ ‘khatin ceiaw hlah’ ‘cutin khatin um aw’ tiah an control ṭheu. Curuangah an duhdan in an ceiaw thei lo ih an beidong thup ṭheu.

Asinan, ngaizawng thawn an ṭhenawk hnuah cun anmah le hmel, taksa thawn milaw dingin an ceiaw ih an mawinak a langsuak deuhdeuh.

Sam sau an si le sam an tan, hnipuan hot deuh an hruh ih a hlan hnakih let in an mawi.

Ṭanlak a na: Nunau ngaizawng thawn ṭhenaw pawl hi an um menmen lo. A hlan hnakih cungcuang dingin ṭan an la. A hleice in an tlangval hlun kha siraw vang seh, tiah a mawi thei bikih langsuah an zuam.

Khatlamah tlangval hlun phirsitnak remcang zet a si ih midang kop hawlnak ah a tharhlamte vek rori in an tuahaw thiam.

Curuangah ngaizawng thawn ṭhenaw nunau khi a hlan hnakin mi mawi zetah an suak sawn ṭheu.