Ashleigh Mason kum 26 nu cu Vodka le White Claw zu a in rawi ih a rit aat tuk ruangah motor ih rak hngak a naunu thawn an buai ciamco, tiah theih a si.
Hi thilthlennak hi US Utah Salt Lake City ah a si ih kan dung zarh khat liam ih thilthleng a si.
Ashleigh Mason cun motor ih rak um ngiongi men a naunu cu a samtuk in a phim ciamco ih a naunu ih mitmu rori keu pawtsak a tum. A hacang rial in a naunu ih mit cu a keu ih a naunu ih mitkil an tlek seksek hleiah ha neh khal a tang cercer thei, tiah an sim.
A naunu cu a unu ih keunak a mitkil pem le thi dom in a talbuai rero. Ashleigh Mason asile a tlan vurvo ih an kiangih park ah a va relh. Cule zu a rit aatnak langsuakter in a ku ruangro.
An thawmvang ruangah palik le venghnen pawl an ra thleng cih. A naunu hi a hmin tarlang an duh lo. A mitbu siat ruangah plastic surgery tuah lo a ngah nawn lo, a mitmu tuamtu tiangin a tlek, tiah palik pawl cun an sim. Asinan a mit kiangkap thi a tam tuk ruangah ziang dinhmun a si, timi lawngte palik pawl in an sim thei hrih lo.
Ashleigh Mason cu mawihmang lo zetih cangvaihnak, zu rit aatnak le mi parih a cecang tuksum tuk ruangah Salt Lake City thawnginn ah an kuat. Cuhleiah Pound 1800 cawhkuan phut a si.
Salt Lake Sheriff ih an ngankhumnak ah hi nu hi palik lole ralkap pakhat a hmuhsuam dah ruangah 2021, November ah kaih tong dahtu a rak si. Amah cu New Mexico lammi a si, tiah an sim fawn.
Leave a Reply