Thu feh dan tlangpi ahcun tlangval in fala hnenah duhbia a hlan hmaisa theu.
Asinan santiluan a cak tuk tikah nunau le mipa tluktlanawknak san thar ah kan leng ih nunau sawn in duhbia a hlan hmaisat khalasile a sualnak a um lo.
Cu lawng si loin a thatnak lai khal tampi a um.
1. Na sinak na langter ngam: A lo thlun theutu lole a lo pehtlaihtu cu caan ziangmawzat a rei hnuah a thinlung na kaih ngah hnu, ‘Duhbia’ na hlan hmaisa ngam hi na sinak diktak, langtlang nun na neihzia na phosuaknak a si ih a sual lo lawlaw.
A thu hrimah huatnak thu rel hnakin duhdawtnak thu cu zo cio khalin kan duh theh.
Na duhdawtzia na langter ngam kha mipa fim cun a lo ngaisang phah ding ih koptlak ah a lo neih ding.
2. Caan na khawhral siang lo: Mipa le nunau reipi thlunaw ih a takram pem ngam ngaingai lo hnak cun khua a tlai hlanah simfiangawk puppi mai hi a tha sawn.
Mipa sawn in duhbia hlan ding na hngak na hngak ih sim ti ni a neih lo ahcun nangmah in thil umdan zoihnit ngam vulvo sawn aw.
Ziangahtile mipa hin ngaizawng si loin rualpi kom in a lo kawm men tla a si thei ih na hngak lak pang ding.
3. Mipa tihhrut tuk: Mipa thenkhat hi fala an duh kuahko cingin duhbia hlan ngam lo an tor cu teh!
A mithmai ah, a cetcang ah a lo hua lo ti na theih cun nangmah sawn in duhbia hlan mai aw.
Na ruahnak hnakih nasa in na hlawhtling ding. Anih khal thawpi suah in a tuah ngam lomi ding na tuahsak ruangah a parah a lungawi sawn riangri ding.
4. Na duh ruangah: Sim zo bangin duhdawtnak cu thuh rei a si poh le a puak na theu.
Cui’ puaksuak cu tongkam ah a zitsuak theu ih na duhzia a langsuak a si mai. Anih khalin na lung sung tuarnak lo theihpi in a lo cohlang tuk ding.
5. Tluktlanawknak: Tulai san ah nunau le mipa danglamnak a um nawn lo.
Zalen zetin kan duhduh kan tuah thei, kan tong thei. Curuangah mipa tengteng ih thiltuahmi thlir cuahco, hngah cuahco san a si nawn lo.
Nunau hin mipa hnak hmanin thil sunglawi an tuah thei, ti na langternak a si ih a poi lo lawlaw. Duhbia ren loin hlan mai aw!
6. Kaihtangnak remcang: Na duh kuahkomi mipa cun duhbia a lo hlan lo hmanah nangmai na hlan hmaisa asile kaihtangnak remcang na tuahaw thiam tinak a si.
A san cu a thinlung ah na taap ding ih mai duhbia hlantu nunau tiah a lo hngilh zoksak lo ding.
Curuangah na tongkam kha ren rengreng aw hlah.
Leave a Reply