NUG hi thli par acozah si lo dingah le hmaisong loten soisel dingah mipi sawm

NUG acozah hi thli parih acozah si lo hram seh, tiah NUG Acting President in sim.

No description available.

SAC ralhrang dotu NUG acozah hi thli lakih acozah si lo hram seh, tiah NUG acting president Duwa Lashi La in a sim ih tlangpar hriamkai pawl hnen ihsin bomnak an ngah thu a rel fawn.

NUG acozah tonkhawmnak a ttum 82nk ah NUG acting president Duwa Lashi La in tuvekin a sim.

NUG acozah hin milai zawnruah bombawinak an tuan ko nan, hmunhma bikhiah a si thu, atu-ah luah ram kau zet an arh vivo thu, senpi uknak pawlkom din vivo a si thu, NUG acozah cu thli parih acozah a si lozia hmuhsaknak langter a si vivo ding thu a rel.

“2023 sungah raldo thu ah siseh, ramthukhelnak ah siseh rahsuah tha zet kan seng vivo ka beisei. Kan beisei vekin mipi khalin an beisei ve ka zum.

NUG hin a hlanih ramthukhel hruaitu pawl mawhpalhnak ihsin kan zirsuah a tul. Ka sim duhmi bik cu NUG hi thli lakih acozah si lo hram seh, ti hi a si,” tiah a sim.

Atu dinhmun ah tlangpar hriamhrei kai pawl thawn lungrual zetih tuantlangnak a ummi hi thathoza ngaingai a si thu NUG acting president in a sim fawn.

“2023 ahcun dothlengnak ah thlengh danglamnak nasa zet a suak ding. Hi thlengh danglamnak sunglawi zetah khawruahnak kaupi thawn tlangpar hriamhrei kai pawlkom pawl in hna in tuanpi ka hmuh tikah ka phur sinsin,” tiah a sim vivo.

Hmaisong riai loin NUG soisel rupro dingah NUG Acting President in mipi sawm.

NUG acozah cu hmaisong riai loin soisel ngam rupro dingah NUG acting president Duwa Lashi La in January 10 ih dothlengtu pawlkom 12 thawn an tonawknak ah a sawm hai.

NUG hi Thalno dothleng caan sungah ramthukhelhnak le raldonak ah kaihruaitu vekin lang hmansehla leipar ah a takram ih cangvaitu pawl ih rinsannak a um lo ahcun hmailam kekar a baibahter thei.

Curuangah khatlam khatlam upatawk thiam a tul zet, tiah President Duwa Lashi La cun a sim.

“NUG acozah hi hmaisong riai loin in soisel ngam dingah zangfah ka lo dil taktak. NUG hi ziangtik lai khalah mah palung duhnak men ih hnatuan ding kan si lo,” tiah a sim.

A kum zawngih tah tikah dothlengtu pawl ih an kum a no zet nan, mino thazang kan upat thiam ding khal a tul lawlaw, tiah a sim.

Hi tonkhawmnak ah leipar cangvaitu pawlkom 12 le NUG Acting President cu nazi 3 sung thu an reltlang, tiah theih a si.

Be the first to comment

Leave a Reply

Your email address will not be published.


*