Dothlengnak thazang a cak vivo ruangah sun ti-thum ih sung SAC ralhrang in tlunvan lam ihsin ttan a khawh ciamco, tiah NUG Defense Minister U Yee Mon cun a sim.
Curuangah mipi ralkap hin doral ih hmalaknak, vanzam ih mi a donak pawl thungaithlak zetin ralrin thiam a tul, tiah October 27 ah a rel.
“Kan doral ralhrang cun tualsungmi le mipi ralkap thleidang loin vanzam ihsin sursum kah ih mi a kah ruangah mipi ralkap hin fimkhurten, thluak fimvar zet neih a tul vekin dothlengnak lungput, dothlengnak khawruahnak fim thawn kan dokham a tul ding.
Vanzam hi raldonak sumtual ah mi hnoksak thei zet le mi siatsuah thei zet a si vek nan, raldonak ih nehnak nemhngettu thilri lawngte a si cuang lo, timi kan theihfiang a tha. Kannih ih dothlengnak hi thluak thawn dothlengnak a si.
Kan fimvar asile kan doral ih hmanmi vanzam tibuai dingin lamzin kan dap vivo thei ding,” tiah PDF pawl zarh tinten thucah sim theunak NUG Radio ihsin NUG Defense Minister U Yee Mon cun a sim.
Cun, NUG ih vanzam dokhamnak ralthuam thu thawn pehparaw in Defense Minister cun hitin a sim hrih.
“Vanzam ihsin kilhimawknak ralthuam (MANPADS) hi lamzin pakhat lawng a um. Hi ralthuam cu leitlun pumpi ih khuahkhirhmi a si vekin haidaihaw zetih zemsuahawk maimai a thei lo.
Curuangah kanmai thluak rori in kan doral ih vanzam rak do thei dan ding lamzin thar kan hawl a tul,” tiah a sim.
Leave a Reply