US ram, Kentucky ramkulh ih innsang pakhatah buainak a thleng ih buainak suaktertu kai dingin an zuamnak ah kahawknak a thleng ih palik 3 an thi.
Misual Lance Storz timi pa hin a nupi le a fanu inn sungah a kharhkhum ruangah palik hnenah report a thleng ih buainak suak a si.
Kahawk a si hnuah misual ih rinhmaimi kum 49 mi Lance Storz cu palik in an kai. Palik pawl hi inn an va thlen tikah nasa takin kahawknak a suak, tiah Floyd County palik bawi John Hunt cun a sim.
Kentucky ramkulh nisuahnak lam tlangpar ram a simi mipum 166 hrawng lawng khawsatnak Allen khawte ah hi kahawknak a thleng ih mi 4 khal hriamhma an tuar, tiah theih a si.
July 2, nazi 7 hrawngah kahawknak a suak ih palik Ralph Frasure, William Petry le Jacob Chaffins an thi. Cu hleiah Jacob Chaffins hi palik ui fim kilkhawitu a si ih a ui fim K9 Dragon timi khal a thi ve.
A thitu lakih officer Ralph Frasure hi Kentucky ramkulh, Prestonsburg khawpi ah kum 39 sung palik tuan a si ih a caan netabik tiang hminthatnak thawn hnatuantu a si.
Kahawknak hi nazi 3 zikte lai a rei ih khatlam khatlam biakremawknak an neih hnuah misual ih zum bikmi Lance Storz cu kaih a si.
Palik officer a thahnak thubuai (2), palik officer that dingih a tumnak thubuai (5), mi that dingih a tumnak thubuai (1) le palik ui fim a thah ruangah thubuai (1) orhter dingin thuthennak zung ah an thehlut.
Leave a Reply