Nu le pa thahsakmi naute kum 40 hnuah nungdam in an hmusal

USA, Texas ramkulh sungah 1981, January 12 ahkhan innsang khat cu that an si ih an fanu kum kim lo naute lawngte himi ni ihsin a hlo.

An sungkhat dang pawl in khuitawkah a um, a thi ve maw, a nungdam lai ti hman an thei nawn lo hnu, kum 40 a rei hnuah nungdam in an hmusal, tiah theih a si.

Nupa tuak khat, neihawknak rei hrih lo, ril ih rah fanu pakhat thla siar fang naute ‘Holly Marie Clouse’ neitu Dean le Tina Linn Clouse tei’ nupa le an fanu cu Florida ihsin Texas ah an vai.

Cutin Jan 12, 1981 ah Houston peng ih tupi sungah misual pawl ih kut tuar in an thi. Mangbangza zet cu Dean le Tina Linn Clouse tei’ nupa ruak pahnih lawng hmuh an si ih an fanute Holly Marie Clouse cu hmuh a si nawn lo.

Kum le tikcu a feh vivo ih kum 40 hnuah nauhakte Holly Marie Clouse cu June 7 (tlawngkainihnih) 2022 ah Oklahoma ah nungdam in hmuh a si.

Holly Marie Clouse an hmuhsal caan ah fate khal 5 nei in innsangnu a rak si zo.

A thuhla an theih vivo dan ah naute Holly Marie Clouse cu Arizona ramkulh ih biakinn pakhat ah biakinn ih hnatuan nunau pahnih in an rak hruai, ti a si.

Holly Marie Clouse an hmuhsal thu ah a pi Cheryl Clouse cun Pathian hnenah lungawithu a sim ih, “Kum 40 sung liangluang ka thlacamnak Pathian in i theihsak,” tiah a rel.