Rakhine ramkulh, Taungup peng, Ta Mauk High School (Branch) tlawng ih saya/ma pawl an cawlh laifang ah inn tlun luanglu ihsin lungpher a tla ih sayama pakhat ih lu a tlak ngah, tiah theih a si.
Sayama ih Middle School zirhtu Daw Khin Mae Zaw a si. Sayama Daw Khin Mae Zaw cu June 7, sun nazi 2:10 ah ca zirh a cawl ih cawlhnak room ah a um.
Culai fangah room tlun ih lungpher a tla ngelcel ih a lu le liang ah a tlak, tiah Ta Mauk khawlal cun a sim. Hriamhma khal a ngah, a ti fawn.
“A lu a kuai. Sizung ah a lu hmun 4 ah an thi. A liang khalah hriamhma a ngah,” tiah a sim.
Hriamtuar sayama Daw Khin Mae Zaw cu Taungup sizung ah tuamhlawm a si hnuah tu-ahcun an inn ah a cawlhahdam hrih.
Hitin tlawnginn zungkhan tlunih cihmi lungpher a tlaknak san hi May 11, zan nazi 11 hrawngih ling a hnin ruangih kuaimi a si ih tu-ah a tla, tiah an sim.
Hi tlawnginn hi Taunguk fimthiamnak hotu khalin a ra zoh ih tuanvoneitu pawl forhfialnak a nei. Tlawnginn siat cu remsal dingin an tum rero lai, tiah a sim.
Ta Mauk High School (Branch) hi dot khat a si ih RC phun tlawnginn a si. Tlawngta 201 le saya/ma, cazi le zan riak ih kiltu 1 telin mi 8 hnatuantu an um.
Leave a Reply