Magway ramthen, တောင်တွင်းကြီး peng, NLD party ih ramthen palai U Win Myint Hlaing cu SAC ralhrang in kum 173 thawngtla dingin daan an tat, tiah thuthennak zung thawn naihniamaw zet mi pakhatin a rel.
Kum 52 mi U Win Myint Hlaing cu Magway District thuthennak zung in October 31 ah thahrum suah dokhamnak thubuai 8 sirhsan in kum 148 thawngtla dingin daantat a si. Anih hi a hlanah kum 25 daantat zomi a nei ih a zaten kum 173 thawngtla ding a si.
U Win Myint Hlaing hi thubuai thenkhat an orhtermi cu thawnginn sung a luh hnuah lenglam ih thubuai thawn pehparawknak a nei, timi khal a tel hnuaihni, tiah thuthennak zung thawn naihniamaw zettu cun a sim.
“Thuthennak zung cun a sualmawh an hawl. A lenglam ih buainak khal a parah burh an tum. Anih asile thawnginn sungah a um zo fawn. Ziangtin thawnginn ihsin lenglam thubuai a pehpar thei nawn ding. Hihi daan kalh a si,” tiah a sim hrih.
U Win Myint Hlaing cu Anti-Terrorism Act Section 51 (c ) kum 148 thawngtla dingah daan an tat. A hlanah Section 505 (a) sirhsan in kum 25 daan an tat zo, tiah theih a si.
U Win Myint Hlaing cu 2021, November 8 ah Shan ramkulh thlanglam ရပ်စောက်khawhnar ah an kai. November 9 ah Magway ramthen, တောင်တွင်းကြီး peng ih a inn khal SAC ralhrang in tawh an hrensakmi a si.
Leave a Reply