Chinmi tam zet umnak US, Indiana ramkulh, Perry Township School Board ah committee sungtel si dingih zuamtu Chinmi Rev. Dr. Hre Mang cu November 9 ah hriltlin a si, tiah theih a si.
Hi Perry Township School Board ahhin a zuamtu mi 7 an um ih cumi lakah mi 3 hril an si. Mi 3 hriltlinmi lakah Rev. Dr. Hre Mang a tel ih vote tha zet hmun in a tling, tiah theih a si.
Perry peng ahhin Suakthuan tlawng 2, Lailak tlawng 2, 6th Grade tlawng 2, Hramthok tlawng 11, KG tlawng 4, le tualleng tlawng 3 an um.
Hi tlawng pawl ah Chin tlawngtla zatek 20% an kai, tiah theih a si.
Pu Van Ceu Uk Khenglawt cun, “Indiana Chinmi zate ih vote kan thlakmi tlamtlingte in kan hlawhtling. Atui’ School Board ih vote kan thlakmi hin sullam a nei taktak. Next Step ah City Council maw, State Presentative maw, State Senate ah kai vivo theinak lamzin a um,” tiah a sim.
Rev. Dr. Hre Mang cun, amah dinpitu Indiana Chin mipi pawl hnenah lungawithu a sim ih, “Indiana um Chin unau pawl, Mizan election result theih tikah Kan zaten thazang kan ngah cio ding ka zum.
Tuitum hrilawknak ah Pathian in Chin miphun in umpizia a langter tiah ka ruat. Mikhual kan si nawn lo, citizen kan si zo.
Tuanvo latu, school, city and state, federal govt. ah siseh kan ram, kan school, kan govt, kan community, kanmai tuanvo a si ti fiangten kan theihciami a takin kan tel ve thei thlang. Democracy ram asi vekin zapi ten citizen hmuahhmuah vote kan thla thei zo.
Pathian nan duhdawt, miphun nan duhdawt ih kei tla in duhdawt in rinsanmi ka hmuh tikah ka lungawi, thazang ka ngah zet.
Duhdawtnak leiba ka lo sam thei lo ding nan, Pathian in duhdawtnak nan langtermi a letza in lo thlawsuah sinsin hram seh.
Chin mi zapi ten lungrualten kan cangvai, kan tangtlang tikah hmailam hrang ruahsannak tampi a suahter. Kum upa, nu le pa, mino le tlawngta pawl kan zapiten kan tel cio.
Business owner pawlin sumpai an thawh, rawl tla an dar, lamzin a phunphun in kan tang tlang.
Kan ram harsatnak ruangah leitlun hmun tinah kan tekdarhaw nan, kan thlennak kipah Pahtian tihzah in Pathian duhmi thupi bikah kan ret ringring pei ih, zumtu unau, phunpi, community ah tang tlang in kan umnak ram hrangah thiltha suahpitu si thei vivo dingin Pathian hnenah thlaza cam phah in kan tang tlang vivo pei uh.,” tiah a sim.
Dr. Hre Mang hi Chin ramkulh, Falam peng, Zawlte khaw suak a si ih 1988 ah Mandalay phunsang tlawng a kai laiah rampi a buai ruangah tlawng cawlh a si ih CNA ah a lut.
Cumi hnuah US ah feh in Political Science in Doctor a ngah. Falam Christian Church of Indiana (FCCI) ah pastor tuan laitu khal a si.
American rampi acozah Department pakhat ah Board sungtel ih mipi hriltlinmi lakah Chinmi a hmaisabik tlingtu a si, tiah theih a si.
Leave a Reply