Nay Pyi Taw thawnginn sungah Suu Kyi cu daan khoh zet hnuaiah an khum

SAC ralhrang in Myanmar rampi thuron Daw Aung San Suu Kyi an retnak Nay Pyi Taw thawnginn room hranpa ahcun daan khirhkhah zet an hmang, tiah theih a si.

Daw Aung San Suu Kyi le amah bangih inn ih kharhkhummi pawl zohman in a thlun thei lo ding ih amahte lawng an umter ding.

A kiltu dingah SAC ralhrang lamih retmi nunau (3) in an umhnawh ding.

Cu hleiah Daw Aung San Suu Kyi cu a fapa Kim Aris in laksawng a pekmi ‘Taichito’ ui fim khal umpi an siang lo, ti a si.

Kim Aris ih pekmi ‘Taichito’ ui fim hi Daw Aung San Suu Kyi in a fapa a ngai caan le a umhar caan ah a lunglen hnemtu ih a zuatmi a si.

Daw Aung San Suu Kyi cu Nay Pyi Taw thawnginn ah June 22 ah ret a si ih June 23 ah a thubuai zoihnitnak an nei, tiah thuthang a suak.

Tui’ dinhmun ah Daw Aung San Suu Kyi cu a hlan House Arrest ih an ret hnak hmanin tui’ a dinhmun hi a khirhkhan sawn, tiah simtu an um.