Nauthlak siannak daan an ṭhiatbalmi parah ramdang hruaitu pawl ih hmuhdan

US Supreme Court in nauthlak siannak daan a thiatbal thu ah UN, Europe ram hruaitu le biaknak lam hruaitu cun thusuah an nei celcel.

UN Human Rights Commissioner Meichelle Bachelet cun, numi covo hrangah a tha lo zet ih mipa le nunau tluktlanawknak timi nasa zetin a siatsuah, tiah a sim.

Nupinu le nunau tleirawl pawl hin an taksa le an hringnun hrangah mahten lairel theinak an nei ih nauthlak theinak khal an nei. Ram 50 pawl hin a hlan kum 25 lai ihsin nauthlak siannak daan an nei rero zo, tiah Bachelet cun a sim hrih.

Canda PM Justin Trudeau khalin US Supreme Court in tuvekin nauthlak a kham cu thin a thawng zet, tiah a sim. American nunau tampi hrangah an hmakhua a pit lawlaw si ko, tiah a sim hrih.

Cuvekin British PM Boris Johnson khalin hihi san dunglam ah kirsal thawn a bangaw. Nunau pawl hin anmahte duhhril theinak an nei. British ahcun nunau pawl hin anmah palungten nauthlak theinak daan an nei, tiah a sim.

French president Emmanuel Macron cun nauthlak siannak daan cu kilhim a si ding ih American nunau pawl kan dinpi, tiah a sim ve.

Cu laiah Vatican City ih Catholic biakinnpi lam cun US Supreme Court ih thuthencatnak cu a lawm zet.

Minung nunnak hi ziangtluk a sunglawi. Cumi hrangah milai pakhatih duhnak men in a famkim tawk lo. Milai pakhat ih nunnak hnuk siatsuah theinak mi pakhatin kan neih lo vekin milai pakhat ih nunnak hi ziangtluk man a nei, tiah Missionary University of the Vatican, Italy in Sim.