December 31 ah Vietnam nauhak kum 10 pate cu inn saknak concrete ban sungah a tla. A hmin hi Thai Ly Hao Nam a si ih nauhak runsuak dingin beihpi an thlak rero, tiah theih a si.
Nam le a rualpi nauhak 3 hi thirsia hawl in Dong Thap ramkulh, inn saknak hmunah an feh, tiah Vietnam thuthang cun a tarlang. Vansiat le malmak ah Nam cu a kauhlam meters 4, a thuklam meters 35 ih thuk concrete ban sungah a tla ngelcel.
Zinglam nazi 11 hrawngah a tlak lai, a kiangnai ih CCTV ihsin an hmuh thu, thuthang ah an suah celcel.
A tlak hnu nazi hrek hrawngah runhimtu pawlkom an thleng cih ih lei laihnak cet, tidai zuhnak cet le crane cet thawn laksuah tum in an zuam rero nan, an hlawhtling thei lo. Runhimtu pawl cun sunsun zanzan ih hna an tuan vutvo.
An thilri in a daih lo ruangah hmun dang ihta cet cangkang zetzet an cah ih January 2 sun cu an cawl lawk. Ruahhmaite a zam serso ringring ruangah an hnatuan a sawt thei lo phah.
Nauhak pate ‘Nam’ cu a thaw a hloh lonak dingah ong ihsin oxygen an pe. Concrete ban siat dingin an zuam nan, a kiangkap leilung a nem tuk ruangah concrete ban cu a sawi thei ih an hlawhsam thotho.
January 1 tiangah cun nauhak pate ih bomnak dil ih au-kio aw an thei nan, January 2 zing ahcun concrete ban sungah camera an ret ko nan, nauhak pate ‘Nam’ ih cangvaihnak an hmu thei nawn lo. Tidai tla an vun pe ih a in le in lo an theithei nawn lo, tiah Vietnam thuthang cun a tarlang.
Vietnam PM Pham Minh Chinh cun a cangtheitawk in milai thazang siseh, cet thilri siseh hmang in nauhak pate runsuak dingin a forhfial hai.
Thuneitu pawl le nauhak innsang lam khal catbang loin thuhla dongsongaw dingin a ngen fawn.
Leave a Reply